எனைத்தும் குறுகுதல் ஓம்பல் ... குறள் 820

13/01/2022 (322)

முரண்பட்டப் பொருளைத்தரும் சில சொற்கள் இருக்கின்றன. இதை ஆங்கிலத்தில் contronym என்பார்கள்.

உதாரணத்திற்கு: overlook : Parents overlook our progress = பெற்றோர்கள் எங்கள் முன்னேற்றத்தைக் கண்கானிக்கிறார்கள்.

Parents often overlook our errors = பெற்றோர்கள் பெரும்பாலும் நம் தவறுகளை கவனிக்காமல் விடுகிறார்கள்

மேலும் பல ஆங்கிலச் சொற்கள்: to sanction, to peruse, to enjoin, to screen …

தமிழில் அது போன்ற ஒரு சொல்லை நம் பேராசான் குறள் 820ல் காட்டித் தருகிறார்.

அது தான் ‘ஓம்பல்’. ஓம்பல் என்றால் போற்றுதல், பாதுகாத்தல் என்று பொதுவாக பொருள். நாம் பார்த்த ஒரு குறள்:

“தென்புலத்தார் தெய்வம் விருந்தொக்கல் தானென்றாங்கு ஐம்புலத்தாறு ஓம்பல் தலை.” --- குறள் 43; அதிகாரம் - இல்வாழ்க்கை

வரும் குறளில் ‘தவிர்த்தல்’ என்றப் பொருளில் பயன்படுத்துகிறார்.

“எனைத்தும் குறுகுதல் ஓம்பல் மனைக்கெழீஇ

மன்றில் பழிப்பார் தொடர்பு.” --- குறள் 820; அதிகாரம் – தீ நட்பு

மனைக்கெழீஇ மன்றில் பழிப்பார் தொடர்பு = தனியாக இருக்கும் போது நட்பு போல பாராட்டி, பலரோடு கூடி இருக்கும் போது பழிப்பவர்களின் தொடர்பு; எனைத்தும் குறுகுதல் ஓம்பல் = எவ்வளவு சிறிய தொடர்பாக இருப்பினும் அதைத் தவிர்க்க.

மேற்கண்ட குறளில் ‘ஓம்பல்’ என்ற சொல் தவிர்த்தல் என்ற பொருளில் வருகிறது.

இது போன்று, தமிழில் உள்ள முரண் சொற்களை உங்களுக்குத் தெரிந்தால் பகிரவும்.

மீண்டும் சந்திப்போம், நன்றிகளுடன், உங்கள் அன்பு மதிவாணன்.